Riwayat Pembangunan Tugu Raja Napasang

Tugu Raja Napasang

Riwayat Pembangunan Tugu Raja Napasang Simanullang Lumban Ri di Sigaol-gaol Desa Simangulampe Bakkara Kecamatan Baktiraja Kabupaten Humbang Hasundutan Provinsi Sumatera Utara

On ma Riwayat Pembangunan Tugu Raja Napasang

Tapaihut-ihut ma riwaat pembagunan Tugu Raja Napasang. Margogo ijur bari, sada pandohan na mansai lohot di piga hali rapot ni angka natua-tuanta na parjolo i. Marsangkap nasida laho pajongjong sada partanda ni ompunta Raja Napasang Simanullang, dohot ompung boru Nair Nauli Boru Sianturi Bona Ni Onan. Ala marnida do angka situa-tuanta i di hametmeton dohot hapogoson ni pinompar ni ompunta di hatiha i.


la sangkap i binoan ni amanta Jamuara Simanullang (Ompu Vanal). Ro nasida ‘ sian Dairi tu Tano Simangulampe, paboahon sangkap jala mangido panuturian sian angka natua-tuanta na adong di Tano Simangulampe.


Jolo tangkas do angka natua-tuanta na parjolo i martuptup sibahue marunung-unung gompul, marsilima-lima, mamangke hamanaton. Manuhat timbo, mangalilit bolon, laho pasada tahi pasauthon sangkap na uli laho pajongjong tugu ni ompunta Raja Napasang Simanullang Dohot Ompung Boru Nair Nauli Boru Sianturi Bona Ni Onan.

Rapot Mambahen Tugu Raja Napasang

On ma rapo naung diulahon aringo tu patupahon tugu Raja Napasang. Rapot na parjolo Tanggal 24 juni 1984 jala diuduti marpiga hali marrapot. Gabe dos tahi maniti ari Tanggal 23 september 1984 pasahathon pande patung tu Amanta St.Ernis Simanullang pinompar ni ompunta Juara Toba nasian Pearaja Duru. Jala peletakan batu pertama Tanggal 6 oktober 1984 na diulahon di bagasan partangiangan.

Ulaon i na nidohotan ni anggi doli pomparan ni ompunta Pamuha Raja, hula-hula Nainggolan, Pasaribu, Sianturi, dohot raja bius ni Bakkara. Ia inganan ni tugu i di tano na pinungka ni ompunta Raja Napasang Simanullang dohot ompung boru Nair Nauli boru Sianturi Bona ni Onan. Di holang-holang ni Aek Sigaol-gaol dohot Aek Sipangolu.

Pesta Tugu Raja Napasang

Di Bulan April 1988, ro ma boa-boa ni pande naung sidung di pandei patung i. Di Tanggal 5 Mei 1988 marhite adat borhat ma natua-tua laho mangalap patungi sian Pearaja Duru,Matiti. Jala di Tanggal 8 Mei 1988 ma dipanangkok patung ni ompunta Raja Napasang Simanullang dohot ompung boru Nair Nauli boru Sianturi Nona ni Onan

Di Tanggal 11 Juni 1988 dipatupa ma tonggo raja. Ai nungga dos roha ni angka natua-tuanta na parjolo i laho mamestahon patung di Tanggal 4, 5 dohot 6 Juli.
Denggan do mardalan pesta i jala adong si ingotonta janji ini angka natua-tuanta di tingki na mamestahon tugu i.

Janji di Pesta Tugu Raja Napasang

  • Hami marjanji : songon panghabiari ni roha nami dohot panghaholongion ni tondi nami di Tuhanta, ingkon songon i do panghaholongion nami pasangaphon natoras nami. Jala ingkon songon i panolopion nami manuruti poda ni situa-tua nami angka naung parjolo i
  • Hami marjanji : na so jadi martilla hami di hahurangan dohot di hinamago ni dongan nami. Jala ingkon rade hami manesa hasalaan ni dongan nami, asa somba marhula-hula, elek marboru, manat mardongan tubu
  • Hami marjanji : ingkon sada hami songon daion aek tawar di bagasan ruma tangga, huta, nang di balian., asa si sada anak si sada boru. Hami marjanji ingkon ringgas hami mandohoti harungguan nami, asa disi hami mangguruhon hata ninta, ai hata torop, hata sabungan
  • Hami marjanji : ingkon patureon nami hadirion nami laho mangeahi hadumaon, hamajuon, dohot habisuhon. Jala olo hami mangharingkothon nasa ulaon na denggan di tonga-tonga nami olat ni on tu joloan on. amen

21 thoughts on “Riwayat Pembangunan Tugu Raja Napasang”

  1. Molo adong angka informasi na berhubungan tu riwayat pembangunan tugu Raja Napasang on, denggan ma surathon hamu marhite kolom komenar on ate, jadi asa tangkas tarida sian ise angka masukan nauli na denggan naung dipasahat padengganhon barita on, mauliate

  2. Hotto Berman Simanullang

    Nauli ma antong Angha barita si songon on luluanta,asa lam hantus jala nalnal taboto saluhut Angha sejarah na marpardomuan tu ompunta Bona na na sumundut Hita.Songon pomparan na Hita:inghon Marusaha Karas do Hita mambuha sejarah ni ompunta i marhite i boi ma antong Hita pasinghop bohal laho mangadopi saluhut turpuk dht rumang ni hamamasa ni parngoluon lumobi di tinggi naumpudi on.horas ma Hita saluhutna di bagasan adat,Gabe pinarorot ni uhum,Mauliate ma.

  3. sahala simanulang

    Gabe ma jala horas dihita saluhutna pomparan ni opputa raja napasang br sianturi, horas, Tuan nagani no 15. Toga ulubalang.

  4. Almen roberr simamullang amd ak.nmr.15 sian pinoppar ni tuan nagani.

    Mauliate ma dituhanta nunga massai lasroha ala naung jongjong tuguni op pung i pangidoan tutuhani anggiatma sude pinoppar gabe anak nahasea jala parpangkat dht gabe pengusaha.

  5. Anak ni Opputta Simanullang
    1). RNS (Raja Napasang Simanullang)
    2). PRS (Pamuha Raja Simanullang)
    3). TDS (Tuan Dilimang Simanullang)

    Chandra Manullang / Br. Sinaga
    Amani Kembar (Pak Kembar)
    RNS NO. 14 GENDERAJA
    Medan – Sumut
    HP / WA 0813 9745 0648

  6. SM.RAJA NAPASANG

    TINAPPUK BULUNG SIHUPI
    PINARSAONG BULUNG SIALA
    GABE MAHITA MAULI
    JALA SAHAT MA HITA MAMORA…

    HORAS HORAS HORAS

    SUDIANTO MANULLANG/BR SIMANJUNTAK
    NO 14 PINOPPAR NI OPPU NATAKKANG.

Leave a Reply

Your email address will not be published. Required fields are marked *