Raja Napasang Simanullang Lumban Ri

Raja Napasang Simanullang Lumban Ri, anak siahaan sian Toga Simanullang. Tubu ni inanta Boru Nainggolan, tubu di Tano Bakkara, laos monding di Tano Bakkara. Mangalap boru sian Muara, boru ni hula-hula Sianturi ( bona ni onan), na margoar Nair Nauli Boru Sianturi. Manjalo pauseang sian hula-hula Sianturi ima na margoar Sawan Silinggom

Falsafah Hidup ini Raja Napasang Simanullang Lumban Ri

Raja Napasang Simanullang Lumban Ri

  1. raja na berwibawa na singal
  2. raja sisungkunon,
  3. raja naolo paulaean,
  4. sipaudut hosa loja, sipabosur na mauas, sipabutong na male,
  5. na sai tongtong sisada tahi, sahata saoloan tu pomparan ni ompunta sijujung harajaon

Jala on ma falsafah sian Ompunta Raja Napasang na so jadi lupahonon:
1.sae do utang ni na pogos, alai anggo utang ni na mora dang sae.
2.manat mardongan tubu, somba marhula hula, elek marboru (dalihan na tolu)

Huta ini Raja Napasang Simanullang Lumban Ri

Raja Napasang Simanullang Lumban Ri marhuta ma ibana di Sigeduk. Jala udaman ni dorbiana; mulai sian Sigeduk torus tu Sigaol-gaol, sahat tu Huta Bagasan sinuaeng, Desa Simangulampe. Sude pinggiran ni dolok, sian topi tao sahat rodi gingjang ni sapsap bire ni dolok, olat ni batu magulang.

Di Sigeduk, dipajongjong ibana ma ruma ( jabu) dohot sopo. Hata ruma na disingkat (dipapendek) do i sian hata: ririt uhum mahotari adat lapatanna, dalihan na tolu. Jala hata sopo dipapendek sian hata : satahi olo pangomoan ondop, na marlapatan bersifat gotong royong manang liap (mangaliap)
Asa hata ruma dohot sopo naung dibahas ompunta do i na jolo, hape nuaeng nunga mago ruma dohot sopo ( ruma batak dohot sopo parsaktian)

Parngoluon ini Raja Napasang Simanullang Lumban Ri

Songonon ma parngoluon ini Ompuna Raja Napasang Simanullang Luban Ri. Mardengke, mangula tano, mardorbia. Adong do muara ni sada batang aek, ima Aek Sigaol-Gaol di Tao Toba dibahen ibana pardengkeanna. Disuan do disi Dengke Ihan. Dibahen do tanda ni dengkena i, dirusuk do hapi-hapi ni dengkena i dohot padang (induk ni dengkena).

Jadi anggo molo najolo godang do Dengke Ihan di Tao Toba. Hape anggo nuaeng dang adong be ihan di Tao Toba, nunga musnah di bahen jahir. Alai adong halongangan nihilala di tingki pestanta Tanggal 4 Juli 1988. Ala porlu Dengke Ihan pangkeonta tu pestanta i. Disuru do naposo laho mandurung tu pardengke-dengkeon ni Ompunta Raja Napasang Simanullang. Dapot do Dengke Ihan 7 ekor, laos i ma dipangke tu ulaon i, da halongangan ma i.

Mangula tano : mardarat (marladang) do Ompunta Raja Napasang na jolo di sekitar ni Sigeduk. Ala hatiha i dang adong dope hauma saba (hauma na maraek). Burju do ibana mangula, jala gabe na niulana, dang adong namanegai suan-suananna. Jadi toho do na nidok ni hata i :

  • pamuro naso mantan sior,
  • parmahan naso mantan batahi,
  • di jolo sieahon, di pudi sipaenteon, di tonga-tonga siharungguan,
  • parsolup si opat bante, parhatian naso olo teleng ,
  • laos manuan patik, manang ise naolo paimbar-imbar solup, papeol-peol uhum, manoro ma babiat tu tonga-tonga ini huta (na marlapatan ro ma hasusahan )

Marcdorbia : asing do cara ni ompunta na jolo tu cara ni hita jolma sinuaeng. Najolo di udaman do dorbia, dang diparmahan i, disi ma manggagati ,disi ma maranahi. Asa boi do dang diboto nampunasa naung tamba, hape dorbiana (horbo,lompu,hoda). Dung pe dibilang asa diboto naung tamba. Hape anggo nuaeng diparmahan/ditambat do dorbia. Asa songon i ma Ompunta Raja Napasang Simanullang Lumban Ri (disapsap bire bire i ma dorbia i manggagati jala maranak)

Anak ni Raja Napasang Simanullang Lumban Ri

Dua do anak ni ompunta raja napasang ima : Datumahuring Dohot Genderaja. Jala adong dua boruna ima : Anian, muli tu Raja Sinanti Marga Siregar, di Ria-ria Dolok Sanggul. Sumilla, muli tu si Huta Lobu Marga Lumban Batu di Pancur Batu Dolok Sanggul.
Anakna nangkok ma sian Bakkara tu Hautulason (sibatumamak) Matiti
Pahompuna 4 i ma

  • Tuan Nagani,
  • Runggumalela,
  • Juara Sodompahon,
  • Ompu Bonor.

Sahalak sian pomparanna on ( pahompuna on) dialap ompunta Raja Napasang mulak tu Bakkara sian Matiti (Hautulason) ima Ompunta Juara Sodompahon. Asa adong mangingani tano na pinungkana di Bakkara. Asa molo nibilangan sundut sian Ompunta Raja Napasang sahat tu na umposo 29 Juni 2013 nungnga adong 20 sundut.

Asa mangihuthon sundut on nungnga torop sopiga pomparan ni Ompunta Raja Napasang Simanullang Lumban Ri marserak di desa na ualu. Anggiat ma ditambai Tuhanta hagabean, hasangapon, hatoropon ni jolma, hamajuon, sahala, sijamaon ni tangan di hita sude manang na didia pe maringanan.

3 thoughts on “Raja Napasang Simanullang Lumban Ri”

  1. Lardis Simanullang, Juara Sodompahon No. 14

    Tambai cerita ni biang nai Anaha…nga denggan be na binaen mon. Kembangkon ma torus da…mauliate

  2. Molo adong info tambahan na melengkapi barita on, denggan ma surathon hamu di kolom komentar on, asa jelas tarida sian ise angka masukan na uli jala na denggan taringot tu barita on. Jadi kolom komentar on gabe artikel tambahan, na boi jahaon ni angka na ro tu website on. Mauliate.

Leave a Reply

Your email address will not be published. Required fields are marked *